Hamide Stringa

Hamide Stringa, këngëtare, pedagoge, historiane dhe kritike e muzikës lindi në vitin 1932 në qytetin e Elbasanit. Ajo vjen nga një familje e madhe elbasanase, me një baba të shkolluar në Akademinë Ushtarake të Stambollit. Hamide Stringa njihet edhe si pjesmarrëse në dhjetë pedagogët e parë të Konservatorit Shtetëror të Tiranës, për çeljen e të cilit punoi paraprakisht së bashku me kolegë të tjerë muzikantë, përfshi drejtorin e ardhshëm të këtij Konservatori, muzikologun Albert Papariston. Ky grup muzikantësh i ngritur pranë Ministrisë së Arsimit të kohës, nën drejtimin e kompozitorit Nikolla Zoraqi, u bënë prjektuesit e shkollës së parë të lartë muzikore në Shqipëri. Si pedagoge themeluese e lëndëve të Historisë së Muzikës shqiptare e botërore, H. Stringa drejtoi dhe ishte bashkëautore e teksteve të historisë së muzikës botërore I-IV, bashkëautore e teksteve të historisë së muzikës shqiptare. Eshtë autore e shumë artikujve teorik dhe kritik mbi muzikën si edhe e dis botimeve monografike: Historia e Muzikës Botërore (v. I-IV), Lola Gjoka dhe Jorgjia Truja.

Jeta dhe veprimtaria

Prof. Hamide Stringa që në moshë të vogël spikati për aftësitë në këndim dhe për veshin perfekt. Ajo ishte një vajzë guximtare, e cila i doli përpara jetës me kurajo e me vullnet për të kapërcyer çdo vështirësi. Hamide Stringa lindi në qytetin e Elbasanit në vitin 1932, kreu studimet e mesme në Liceun Artistik “Jordan Misja” nën drejtimin e Jorgjia Trujës dhe më pas vazhdoj studimet e larta në Konservatorin “Cajkovski” në Moskë për kanto, ku këndoi në disa opera si Dasma e Figaros (në rolin e Suzanës), Vajza prej dëbore  etj. Nga viti 1956-1962 punoi pranë TOB dhe me themelimin e Konservatorit Shtetëror të Tiranës më 1962, filloi të punojë si pedagoge e historisë së muzikës, më vonë edhe kantos dhe muzikës së dhomës. Disa vite mbajti aty edhe detyrën e shefes së katedrës. Që pej kësaj kohe nisi të shfaqet në shtypin letrar dhe artistik, më pas edhe në emisione të RTSH, për problematikat e muzikës shqiptare dhe botërore.

Konsolidimi i shkollës së lartë muzikore dhe zhvillimi i ndjeshëm që mori muzika shqiptare pas viteve ’60, krijuan domosdoshmërinë e hartimit të teksteve të historisë së muzikës. Prof. Hamide Stringa ishte një ndër promotoret e kësaj ndërmarrjeje të rëndësishme. Në fillim të viteve 1980 filloi të punonte si bashkëautore e tekstit të Historisë së Muzikës Shqiptare (dy volume; 1983), ndërsa më vonë ishte kryeredaktore përgjegjëse për katër volume e tekstit të Historisë së Muzikës Botërore (1987) si dhe autore e një lënde voluminoze të tyre. Vite më vonë (2000-2002) botoi katër volume të tekstit të vet integral të Historisë së Muzikës Botërore, me njërin prej të cilit fitoi çmimin e parë si “libri më i mirë studimor i historisë së muzikës në gjuhën shqipe”. Kësaj periudhe i përksin edhe dy botimet e saj monografike për dy artiste të njohura të skenës shqiptare, pianistja Lola Gjokën dhe këngëtarja Jorgjie Truja.

Krahas veprimtarisë pedagogjike dhe studimore, Hamide Stringa ka qenë një figure aktive e jetës muzikor shqiptare, sidomos gjatë periudhës 1962-1973. Në vitin 1962, në Kongresin e Dytë të Lidhjes së Shkrimtarëve dhe Artistëve, ajo u zgjodh anëtare e kryesisë në funksionin e Sekretares për Muzikën. Këtë detyrë e mbajti deri në vitin 1973, kur u shkarkua e kritikuar për pikëpamje liberale, në frymën e Plenimut IV famëkeq të PPSH. Kjo ishte shuplaka e parë e rëndë që ajo mori në jetë, e dyta erdhi pak vite më pas me daljen e detyruar në pension të parakohshëm. Por realisht largimi prej radhëve të pedagogëve të punësuar mbeti thjesht formal për Hamide Stringën. Pasioni, këmbëngulja, dashuria për profesionin si dhe vlerësimi i kolegëve, nuk ja ngushtuan hapësirat e veprimit. Ajo mbeti pedagoge e ftuar e Universitetit të Arteve deri në vitin 2012. Në vitin 2015, me kërkesë të Fakultetit të Muzikës, Universiteti i Arteve përcolli propozimin për dekorimin e saj nga Presidenti i Republikës.

Në karrierën e saj të gjatë pedagogjike, Prof. Hamide Stringa, krahas drejtimit me autoritet profesional të kurseve të historisë së muzikës, ka dhënë kontribute të çmuara edhe si pedagoge e studentëve të kantos. Me pasion të admirueshëm dhe me kulturë të vërtetë profesionale, ajo e ka ushtruar këtë detyrë duke përgatitur disa breza këngëtarësh, ndër të cilët disa kanë bërë emër si brenda ashtu dhe jashtë vendit: Manjola Nallbani, Vikena Kamenica, Linda Kazani etj.

Hamide Stringa, kjo grua shtatvogël, por me një botë të madhe shpirtërore, sot buzëqesh dhe me modesti thotë se është e kënaqur nga jeta, pasi gjithëçka e ka arritur falë punës së palodhur. Ajo ende këndon, po aq e intonuar dhe me pasionin që vitet nuk ja kanë rreshtur. Tek e dëgjon të flasë, kur ja njeh jetën dhe karrierën, nuk ka se si të mos mendosh se ajo është një shembull real i gjithë atyre që kërkojnë suksesin. Jeta e saj të bën të reflektosh mbi muzikën dhe muzikantët shqiptarë. Ndonëse një vend i vogël, Shqipëria ka rritur e ushqyer në kopshtin e saj lule të bukura dhe ndër më të bukurat prej tyre është edhe Hamide Stringa.

                                                                                                            Përgatiti Matilda Gjika

You may also like...

1 Response

  1. Ademi says:

    Personalisht e mbaj mend kur ligjeronte gjithe pasion dhe kompetence. Kur analizonte deri ne detaje operat apo veprat simfonike. Mund ta kujtoj vetem nenkete deciture: E mrekullueshme.

Leave a Reply

Your email address will not be published.

Subscribe
No Thanks
Thanks for signing up. You must confirm your email address before we can send you. Please check your email and follow the instructions.
We respect your privacy. Your information is safe and will never be shared.
Don't miss out. Subscribe today.
×
×
WordPress Popup
error: Sorry! You don\'t copy...